المستحيـــلات (المُرعـــب)

لو ماعنى لي صاحبي بآعني له
باقطع على شانه طوال المسافات
ماني بادوَر في البدايل بديله
وماهوب يسمع فيَ حاسد وشمات
كانه على شوفي يدله دليله
أنا على شوفته أسوق البشارات
لاطاح من جور الزمان أرتكي له
أرسم على مبدا مطيحه نهايات
صاحبه أنا وشلون مااحتال اشيله
وأنا وحيد وقامعٍ لي عصابات
عبَادة الشهره هواة الكحيله
اللي ضمايرهم بشلقة ريالات
اكتب على ايدين الزمان البخيله
ان البخل ماهو بشحَ الكرامات
البخل حرمان اليدين الطويله
من كسبة الافعال في عصر الاصوات
أيَست من هذا الزمان وحصيله
لانَي تعبت اثور واستبشر الآت
الماضيات من الليال الهزيله
لايمكن انها تصنع المستجدات
تمويت الاحيا فالعيون الذليله
صدقني انه مثل تمويت الاموات
لو يرفعك وقت الرخا والرذيله
سبع الاراضي تحت سبع السماوات
حنا خلقنا للرذيله فضيله
نصلح اغلاط الزمن بابتسامات
اليا تجملنا خذينا الاصيله
واليا ابتلينا بالخطا نصبح آفات
رجَالنا يسوى لحاله قبيله
أستغفر الله لو باقول اننا آيات
إن كانت أغلاطي بعمري قليله
مجرد اني اكلمك عشر غلطات
حرام بك صرف الحروف الجزيله
وحلال فيَ من خصَني له وبالذات
اللي ملايكة الرضا تنحني له
عليه من ملح الطفوله علامات
في نظرتي كل الوجيه الجميله
مخلوقة تسوي لوجهه دعايات
ملامحه من غير حكي تحكي له
تفرض عليَ اللي تقوله وبسكات
لو قالت ان الدايره مستطيله
قلت الدواير كلها مستطيلات
يا اخاذ لبَات العقول الثقيله
أخذتني كلي ولاقلت لك هات
ليه ارتجي عطفك وليه اشتكي له
والهات في قاموس عشرتك هيهات
حببتني قربك وذاب تعبي له
في جمر عقبه بعد عقْبه وعقبات
(ختمت قلبي عن عشاشيق جيله
ختم المصلَي بالدعا والتحيات)
الين جت ليله عن الفين ليله
وصارت حكايه غير كل الحكايات
ذوَبتني بين الدماث النحيله
وعلمتني فن الرسم والقياسات
وفجأه كذا...(بار الخليل بخليله)
كله لعين مخربين العلاقات
شحيت بي دمع الرموش الظليله
وقفتني بين الأمل والمحاتاة
وجدي على قلبي وياعزتي له
دقات تيَس به وتامَله دقات
ينشدَلك حيله وينهد حيله
الحزن خطوه والغرابيل خطوات
إذا الأمل رمز القلوب النبيله
فانا(مأيس)منك في كل الاوقات
ان كان شوفة غرتك مستحيله
أكيد لمسك سابع المستحيلات

تسلم يمناك ولاعدمنااااك..
شكرا على انتقااائك الرااائع..
الله يسعدك ويستر عليييك..
تحياتي لك..من اخووك..

كل الشكر لكـ على الموضوع تقبل مرووري., ودمتـ بخير.,,

متشكـــرين على مروركــم